கடவுளே !

எனை இந்தப் புவிக்குள் அனுப்பி வைத்தாயே -

எனை வாழ்விக்கவா ?

அன்றித் தண்டிக்கவா ?

முன்னது என் கையில் எனினும்

பின்னது உன் கையில் அல்லவா?

அது முடிந்ததா ? இன்னும் தொடருமா ?

தட்டு நிறையக் கசப்பைக் கொட்டும் நீ

தித்திப்பை மட்டும் சொட்டுகிறாய் ;

அடிக்கடி என் மண்டையிலும் குட்டுகிறாய்-

சந்தோஷம் ஒன்று வந்துவிட்டால்

சவுக்கடி நான்கும் தொடர்கிறதே !

கண்ணீர்க் குளத்தின் நடுவிலேதான்

சிறு மகிழ்வு பூத்திடல் விதியாமோ ?

எனக்குள் புகுந்து இயக்குவோனே !

ஜதிகள் சுத்தமாய் ஆடினேனா ?

அடவுகள் சரியாய்ப் பிடித்தேனா ?

என் பாதையில் தடங்கள் பதித்தேனா ?

சிலரது நினைவில் நிற்பேனா ?

மறந்த கனவாய்ப் போவேனா ?

தினமும் என் விரலினை உயிர்க்கின்றாய்

' சாவிப் பலகையில் ' துள்ள வைக்கின்றாய் ;[ keyboard]

என்னை அதன் வழி கொட்டுகிறேன்

சிலரது நெஞ்சை அடைகின்றேன் ;

இதனில் நிறைவு காண்கின்றேன் .

--------சந்திர கலாதர்