ஒரு அனுபவம்

&

பௌர்ணமி நாளன்று சரியாக ஆதவன் மறையும் வேளை

கிழக்கே பால்நிலவு நிறைவாய் எழும்--.

காலையில் சூரியன் எம்மூலையில் முளைத்தானோ

அதே புள்ளியில் விழிகளைப் பாய்ச்சிக் காத்திருக்கிறேன்;

சந்திர மலர்வை அதே நொடியில் கண்டு களித்தாக வேண்டும்-

மாலை ஆறைத் தாண்டி விட்டதே ; ஏன் ? ஏன் ?

மனம் தவிக்கிறது ; மேகக் கோட்டைகளும் இல்லையே ?

ஏமாற்றத்தில் ,தொலைத்த குழந்தையைத் தேடும் பாசத் தாய்போல் பரிதவித்து ,

தலை திருப்புகிறேன் கிழக்கையே அலச -

அட ,சற்றுத் தென்புறமாய், பூத்துப் பத்து நிமிஷங்கள் ஆனதால் ,

வானில் தவழ்ந்து ஏறி ,அட்டகாசமாய் எனைப் பார்த்துச் சிரிக்கிறது .

என் கணக்கு தவறானது ;

சித்திரா பௌர்ணமி அன்று உனை ஒரு கை பார்த்துக் கொள்கிறேன் என்று

எனக்குள் சொல்லிக் கொள்கிறேன் .

&

நிலவு , அதுவும் , முழு நிலவு , அதுவும் வசந்தகாலப் பூ நிலவு --

எவ்வளவு அழகாக இருக்கிறது !

அழகு என்ற வார்த்தையே நிலவைக் குறிக்கப் பிறந்ததுதானோ ?

அழகு எனும் சொல்லே நிலவில் வழிந்த அமுதோ ?

அழகிற்கு எத்தனை வேறு சொற்கள் இருப்பினும்

அழகு எனும் இதனை அழகால் வெல்ல வேறு சொல் உண்டோ ?

மற்ற சொற்கள் கவிஞர்களால் தேடி அலையப்படுவது ;

சாதாரணர்களின் பழகு வார்த்தை அழகுதானே !

நிலவே , உன்னை நிலா என்றாலும் தித்திக்கிறது !

இரவில் மிதக்கும் இனிப்பே !

எத்தனை யுகங்களாய் காதலின் ஊற்றாய் நீ பெருகி இருக்கிறாய் !

காதல் உன் மடியில் தலை சாய்த்துக் கனவுள் கலந்தது ;

இரவுகள் மாயாபுரிகளாய் குளிர் நடம் புரிந்தன --

உழைப்பில் தேய் ! ஒளியில் மிளிர்வாய் !-

என்று சொல்லாமல் சொல்கிறாய்-

காதலின் வரலாறே உன்னில் அடக்கம் !

&

இன்று மாலை ஐந்து மணி --

மேற்கே சுடும் ஒளித் திரவமாய் கொட்டிக் கிடக்கிறது ;

கொதிக்குழம்பை யார் மெல்ல மெல்ல அள்ளிச் சூரிய பாத்திரத்திற்குள் நிரப்புவது ?

கைப்பிடிப்பாய் செங்கதிர் உருண்டை ஆக்குவது ?

கசியும் கதிர்களைத் துடைத்து ஆரஞ்சைப் பூசுவது ?

அப்பளம் இடுவதுபோல் தட்டையாய் பெரிதாக்குவது ?

தொடுவானச் சட்டியுள் பொரிப்பது ?

பின் ஆசையாய் விழுங்குவது ?

&

வசந்த காலம் மொட்டவிழ்க்கிறது -

வசந்தம் என்றாலே மாலைத் துள்ளல்தானே !

கொடிகளில் துணிகள், கோபுரக் கொடிகள் ,மரக் கொத்துகள் ,அணியும் ஆடைகள்

எல்லாம் உல்லாசமாக ஆட்டம் போடுகின்றன

காய்ந்த சுள்ளிகள்போல் தோன்றும் மரக் கிளைகளின் பட்டைகளின்

ஒவ்வொரு நுண்ணிய துளைகளில் எல்லாம் பச்சை ஒளிப்பொறி ;

ஆம், பிஞ்சு இலைத் துளிர்கள் !

மரப்பட்டைக்குள் இத்தனை உயிரோட்டமா இவ்வெரிக்கும் வெயிலில் ...வியக்கிறேன் !

வசந்த மாலை நேரங்கள் சொர்க்கமே !

&

-----சந்திர கலாதர்

08.04..2012 / ஞாயிறு /மாலை 6 மணி