இறைவா...ஆ..ஆ..ஆ !

உன் காது செவிடானால் இப்போதாவது கேட்கிறதா ?

அவளைப் பேசச் சொல்;

என்னால் முடியவில்லை-

உன்னால் முடியுமா சர்வ வல்லமையாளனே ?

இறைவா !

நீ எங்கும் இருப்பவனாம் ;

அதனால் கிசுகிசுக்கிறேன்;

அவளைப் பேசச் சொல் !

இன்னும் எத்தனை நாட்கள் மௌனம் மோகிப்பாள் ?

மௌனம் கொல்லுமோ ?

கொல்லும் கொல்லும்தான் -

பாவம் ,அவள் தன்னிலை அறியாதவள் ;

அவளுக்கென்றே மாறாத உலகம் ;

அவள் விழிகளை உள்வாங்கிய உலகம் --

இந்த வண்ண பூமிக்கு அழைத்து வா !

விழி வண்டுகளை மண்ணின் வியப்புகளில் சுழலச் செய்.

வயிற்றின் பசி காட்டு ;

ருசியின் வழி சொல்லு.

நின்ற காலத்தை முடுக்கிவிடு ;

எதிர் காலத்தை இழுத்து முன் நிறுத்து -

ஆம் , அவள் வேண்டும் ;

மறுபடி வாழ வேண்டும் .

----சந்திர கலாதர்