காலையே ! மென் தூறலில் வளர்வாயே
[ மழைக் காலம் அதன் தளர்நடைப் பிஞ்சு மொழிப் பருவத்தில் ]
&
தூறல் நனைத்திடக் குளிர்
தென்றல் உலர்த்திடக்
காற்றில் உலர்ந்ததைப் பூஞ்
சாரல் நனைத்திடக்
காலையே மலர்வாயே இளங்
காலையே வளர்வாயே !
&
நீர்முகில் நிறைந்திடப் பனிக்
கற்பனை சொரிந்திடத்
தளிர்க்கொடி துள்ளிட என்
உள்ளமும் குதித்திடக்
காலையே மலர்வாயே கவின்
காலையே வளர்வாயே !
&
மங்கிய வெளியினில் இசைப்
பறவைகள் குழைந்திடக்
கவிதை மொழிகளால் கொல்
துயரம் பறந்தோடக்
காலையே மலர்வாயே குளிர்க்
காலையே வளர்வாயே !
&
மென்மழைச் சாரலில் இள
மேனி சிலிர்த்திட
இதய கீதங்கள் பசும்
மனவெளி நனைத்திடக்
காலையே மலர்வாயே மழைக்
காலையே வளர்வாயே !
&
தென்னைகள் கூடி ஓர்
தெம்மாங்கு பாடிட
நெஞ்சச் சோலை தன்
இளமலர் சொரிந்திடக்
காலையே மலர்வாயே எழிற்
காலையே வளர்வாயே !
&
கதிர்களை ஒடுக்கியே செங்
கதிரவன் எழுந்திட
மன விசாலத்தில் ஓர்
இள நிலா பூத்திடக்
காலையே மலர்வாயே பூங்
காலையே வளர்வாயே !
&
உயிர்த் துடிப்புடன் இன்ப
உலகம் விழித்திட
வாழும் ஆசையில் என்
உள்ளமும் விம்மிடக்
காலையே மலர்வாயே தேன்
காலையே வளர்வாயே !
&
காலையே மலர்வாயே அன்ன
நடையினில் வருவாயே !
தூறலில் வளர்வாயே பூந்
தென்றலில் நகைப்பாயே !
கற்பனை விரிப்பாயே எனைக்
காதலில் நனைப்பாயே !
&
-----சந்திர கலாதர்
No comments:
Post a Comment